Доделени наградите “Војдан Чернодрински”
Претставата „Змејовата невеста“ од Димитар Молеров, во режија на Нела Витошевиќ, а во изедба на прилепскиот театарски ансамбл е добитник на Гран при за најдобро уметничко остварување на претстава во целина, на 48-то издание на Македонскиот театарски фестивал „Војдан Чернодриски“. Вака одлучи оценувачката комисија на фестивалот во состав: Васе Манчев, Јани Бојаџи и Мустафа Јашар.
„Таа претстава е работена на текст којшто има свој удел во вкупната сума на свои вредности и вредности кои го прават посебно тежок за уметничка интрепретација на театарот. Во него се работи за барање на животни вредности, животна смисла, во еден многу остар судир меѓу стварното и нестварното и тоа ја прави реализацијата на текстот многу тешка и отвора многу за да не се постигне целта, за да се открие пораката, смислата, уметничката вредност на текстот, да се добие еден театарски чин, кој ќе покренува една духовна енергија кај оние кои го гледаат и ќе покаже дека театарот има можности да решава и такви ситуации“, изјави Манчев, претседател на комисијата. Режисерката Витошевиќ ја доби и наградата за најдобра режија, а според актерот Владимир Ѓорѓиевски токму таа има најголема заслуга за ова уметничко остварување.
Награда за главна женска улога и е доделена на Амернис Јовановска Ношиќи за улогата на Зоја во претставата „Прст“ во изведба на Aлбанскиот театар – Скопје, додека Јордан Витанов за улогата на Благој во претставата „Ноќите во бел сатен“, во изведба на велешкиот театар, ја доби наградата за главна машка улога. Драматургот Братислав Димитров ја доби наградата за текст во истата претстава.
Емил Рубен е добитник на годинешната награда за машка епизодна улога „Димче Трајковски“, за улогата на Куче во претставата „Изгубени Германци“ во изведба на Македонскиот народен театар, а награда за женска епизодна улога доби Зарије Јонузи, за улогата на снаата во претставата „Прст“.
Валентин Костадиновски за улогата на Кочкарјов во претставата „Женидба“, а во изведба на Театар „Комедија“ од Скопје е добитник на наградата за млад актер, а Камка Тоциновска е добитник на наградата за млада актерка за улогата на Лили Марија Марлен, во претставата „Изгубени Германци“.
Наградата за современа сценска драматизација и припадна на Викторија Рангелова за драматизацијата во претставата „Шекспир во приказните“ во изведба на Tурски театар – Скопје. Валентин Светозарев ја доби наградата за сценографија, за претставата „Травничка хроника“ во изведба на Народниот театар Битола, Благој Мицевски наградата за костимографија во претставата „Женидба“, а Горан Трајковски ја доби наградата за музика во истата претстава. Кореографот Кренаре Невзати е добитничка на наградата за кореографија и сценски движења за претставата „Шекспир во приказните“, а Сергеј Светозарев на наградата за рекламен материјал за претставата „Травничка хроника“. Со свечено доделување на наградите на годинешните добитници, и со изведба на претставата „Ах, љубов моја“ по текст и режија на Коле Ангеловски, вчеравечер беше спуштена завесата на годинешното, 48-мо издание на МТФ „Војдан Чернодрински“ во Прилеп.