„Добро е што претседателот Иванов попушти и престана да го блокира формирањето на новата влада. Оваа одлука требаше одамна да се случи и конечно го рефлектира исходот од изборите во декември 2016 во земјата“, се наведува во изјавата на германското министерство за надворешни работи по денешното доделување на мандатот за состав на влада на лидерот на СДСМ, Зоран Заев, пренесе „Дојче веле“ на македонски јазик.
Официјален Берлин додава дека првиот важен чекор за надминување на политичката криза е направен, а сега се на ред сите политички актери во Скопје конструктивно да соработуваат. Оттаму предупредуваат политичките актери во Македонија да престанат со интриги и блокади и да им служат на интересите на граѓаните.
„Македонците не заслужуваат врз нивниот грб да се водат политички интриги. Она што ѝ е потребно на земјата и она што нејзините граѓани со право го очекуваат е брзо формирање на нова влада, која брзо ќе се зафати со целосно спроведување на Договорот од Пржино и на реформските приоритети. Потребни се длабоки реформи за да продолжи македонскиот пат кон евро-атлантските интеграции. Германија и натаму ќе ја поддржува земјата на тој пат“, се вели во изјавата на германското МНР.