Лидерот на ВМРО-ДПМНЕ, Никола Груевски, најави дека и натаму како претседател на партијата ќе се појавува на увид или свечености по повод реализација на сите проекти кои што претходната влада ги ветила. Тој нападна дел од медиумите дека тие според него, сакаат да го снема, но, вели тој, таа услуга нема да може да им ја направи.
„Јас сум тој кој ги дава ветувања, кој застанува зад таа програма и го става потписот на таа програма. Јас сум тој кој оди по митинзи и на средби со граѓаните им ветува проект по проект, со рокови кога нешто ќе биде завршено и природно за секој одговорен човек јас да бидам тој кој ќе се грижи секој проект да се заврши навреме и така како што сме го ветиле пред граѓаните. Јас имам одговорност и оние кои сакаат да ги декрадираат нашите активности и да ја свртат темата за тоа зошто се појавувам, нема да им ја направам таа услуга и ќе продолжам сите оние проекти кои сме ги ветиле на граѓаните да ги следиме за да се завршат навреме и со квалитетот кој бил предвиден. Не случајно ВМРО-ДПМНЕ 11 години на десет избори постојано ја добива довербата, затоа што внимава што ветува и уште повеќе внимава тоа што го ветува да се реализира навреме, ако може некогаш и побрзо“, вели Груевски.
Оваа изјава на Груевски доаѓа откако новинарите го прашаа во која функција присуствува на сите настани, потпишување а договори, изградба на автопати, со оглед дека сега е само пратеник и претседател на партија.
Инаку, лидерот на ВМРО-ДПМНЕ денеска имаше две активности. Прво изврпи увид во градежните работи на патот за Сончев Град во Сопиште, а потоа беше во обиколка на зградата на Офицерскиот дом.