Фирмата „Атриум“ од Вевчани, во сопственост на братот на пратеникот на ВМРО-ДПМНЕ, Крсто Мукоски, склучила договор за варосување на помошни простории во „Телеком арената“ за 10 евра од квадрат, пред одржувањето на Супер Купот во Скопје, информираше денеска генералниот секретар на Владата, Драги Рашковски на прес-конференција.
Како што рече тој, овие информации ги добил неофицијално и им порача на медиумите понатаму да истражат.
Рашковски информираше дека има многу недостатоци и пропуштени рокови во реконструирањето на Градскиот стадион во пресрет на одржувањето на Суперкупот.
Тој потенцираше дека Владата мора да ги заврши бараните реконструкции на Арената до 21 јули, бидејќи два дена подоцона, на 23 јули ќе има финална контрола од УЕФА дали Супер Купот ќе се одржи во Скопје.
УЕФА и пратила допис на Фудбалската Федерација на Македонија со одредени забелешки кој од ФФМ до Владата патувал седум дена.
Најголемиот проблем се неинсталираната климатизација, немањето простор за камиони и репортажни возила, планот за евентуална евакуациј.
„Правиме напори за соодветно електрично напојување во случај на дефект“, рече Рашковски, дополнувајќи дека Владата ќе ги забрза работите за одржување на Супер Купот во Скопје.
Рашковски рече дека Акционерското друштво за стопанисување со станбен и деловен простор треба да направи алокација на средства од 2 милиони денари за да се исполнат УЕФА стандардите.