Со 1,5 милион евра буџетски пари месечно, Владата ќе ги поддржи компаниите да исплаќаат минимална плата од 12.000 денари.
Поддршката, како што соопшти денеска министерот за финансии Драган Тевдовски, се очекува да почне да се реализира од септември кога се очекува и стартот на исплатата на минималната плата од 12.000 денари со што до крајот на годинава би биле потрошени шест милиони евра државни пари. Парите веќе се планирани во ребалансот на Буџетот.
„Предвидено е распределбата на парите да се врши за секоја компанија според бројот на вработените кои примаат минимална плата и таа да се реализира во четири рангирани категории. Во првата категорија ќе бидат работниците на кои треба да им се доплатат 2.000 денари, па 1.500 денари“, рече Тевдовски.
Како што најави министерот за овој план треба да се изјаснат и работодавачите и Стопанските комори како една од засегнатите страни. Со нив владиниот тим ќе има средба денеска. Минатата недела за минималната плата владиниот тим имаше средба и со синдикатите. По завршување на овие разговори измените на Законот за минимална плата ќе одат пред Економско-социјалниот совет, а дури потоа пред пратениците.
Ако и работодавачите дадат зелено светло на предлогот на Владата, од септември 130.000 работници ќе земаат минимална плата од 12.000 денари.