Германија се врати на врвот на ФИФА листата по пауза од две години. Смената на лидерската позиција на јулското рангирање на Светската фудбалска асоцијација дојде како последица на крајниот исход на Куп на конфедерации во Русија. „Панцерите“ во финалето го совладаа Чиле со 1:0 и го потиснаа Бразил на второто место, Аргентина е сега трета. Топ 10, редоследно, го дополнуваат Португалија, Швајцарија, Полска, Чиле, Колумбија, Франција и Белгија.
Шпанија падна за едно место (11), а веднаш зад „црвената фурија“ е селекцијата на Италија. Албанија „скокна“ до 63. позиција (+3), Израел назадуваше за 15 и запре на 70, тренд што го има и Лихтенштајн на 191 место (-5).
Македонија е на 133 позиција (+2) со 228 бода. Меѓу двете ранг листи што ги исфрли ФИФА, националниот тим одигра два меча – пријателскиот со Турција (0:0) и со Шпанија (1:2) во квалификациите за СП 2018 во Русија. Токму ремито со Турците во Скопје обезбеди и подобрување на пласманот на ФИФА ранг листата.
Во конечниот нејзин изглед се вкалкулирани резултати од 177 репрезентативни натпревари колку што се одиграа во изминатите месец дена. Најмногу настапи имаше Мексико (10), Андора е селекцијата со најголем скок (57 места), најмногу поени загубија Аргентинците (-213), Намибија со најголем пад (-62 места).