Премиерот Зоран Заев, придружуван од државниот секретар во МНР, Виктор Димовски, попладнево се сретна со државниот секретар за европски прашања во Министерството за надворешни работи на Република Германија, Михаел Рот, придружуван од германската амбасадорка во Македонија, Кристине Д.Алтхаузер, соопштија од Владата.
„Владата на Република Македонија е определена кон инклузивни политики на отвореност кон целата општествена јавност којашто сака и може да помогне во реализацијата на реформската агенда, вклучително и на опозицијата. Исто така цврсто сме насочени кон градење мостови на соработка со нашите соседи и со пријателите од меѓународната заедница, коишто даваат значајна поддршка на Македонија во демократските процеси“ рекол Заев.
Како што информираат од Владата, Рот најави дека Република Германија ќе продолжи да ја поддржува Македонија во реформскиот процес што треба да обезбеди владеење на правото, слобода на говор и да ја осигура демократијата во државата како важни европски вредности.