Дани Алвеш, сепак, останува на континенталниот дел на Европа. Бразилскиот фудбалски репрезентативец беше најавен како засилување на Манчестер сити и наместо промоција на Островот се случи пресврт во последен час. Офанзивниот бек одеднаш реши да му заврти грб на Пеп Гвардиола и да потпише двегодишен договор со ПСЖ, откако богатите газди на „светците“ му понудија неделна плата од 260.000 евра што е, речиси, двојно повеќе од „граѓанската“ што ја имаше на маса.
„Жалам ако Пеп Гвардиола и Манчестер сити се чувствуваат повредени. Дојдов овде да освојувам трофеи. ПСЖ и јас се меркавме долго време и по три години, конечно, се венчавме“, напиша Дани Алвеш во пораката на социјалните мрежи по промоцијата во Париз.
Алвеш во минатата сезона настапуваше за Јувентус. Го освои Скудетото во Серија А и играше финале во Лигата на шампиони, но не успеа да го подигне пехарот. Нова шанса ќе има веќе во наредното издание на елитното клупско натпреварување на УЕФА.
„Дојдов овде да играм со Марко Верати. Се надевам дека ќе ни помогне да го оствариме сонот“, дополни Бразилецот.