Во крајно нехумани, нечовечки и деградирачки услови живеат осуденицоте во затворот Идризово. Народниот правобранител, Иџет Мемети денеска на прес-конференција, презентирајќи го годишниот извештај рече дека состојбите во затворот се крајно понижувачки.
“Во затворот се сместени 1966 лица, што е дупло повеќе од капацитетите. Во страшна состојба се и приемното и амбулантното одделение. Во приемното одделение нема прозори и кревети, а во амбулантното одделение болните спијат на кревети без душек. Бактерии и вируси демнат од сите страни” , рече Мемети.
Правобранителот соопшти дека во затворот владее корупција и дека со пари затворениците можат да купат мобилни телефони, кревети, други подобности и дрога.
Тој додаде дека посета извршиле и во 8 полициски станици од кои само една ги исполнувала минималните услови.
Во овој извештај се направени вкупно 50 посети од кои 4 во казнено поправни установи, 8 во полициски станици, 1 во заводот во Демир Капија и 37 во центрите за згрижување бегалци.
Посетите ги правеле лица ангажирани со договор на дело, затоа што Македонија немала Национален превентивен механизам. Ангажирани биле криминолози, психолог и психијатар, правници, социјални работници и медицинска сестра.