„Борбата за ГТЦ е борба за Скопје, а борбата за Скопје е борба за Македонија“, порача денес на вториот ГТЦ Форум, режисерот Александар Поповски.
Учесници во форумот меѓу Поповски беа и уметникот Јане Чаловски, архитектот Трајко Димитров и други кои го изнесоа своето видување во борбата за ГТЦ.
На собирот продолжија стандардните активности:
• се собираа потписи за петицијата за зачувување на ГТЦ во неговата автентична физичка состојба;
• се пишуваа мислења за самиот ГТЦ: „Зошто го сакам ГТЦ?“;
• се пишуваа идеи и препораки до архитектите на новата псевдоисториска фасада и до управата на ГТЦ;
Дополнително, јавно беа прочитани отворените писма до премиерот и надлежните институции а беше изложена и отворена за дискусија измената и дополната на Деталниот урбанистички план за Мал ринг од декември 2012г.
Серијата настани „Го сакам ГТЦ“ се реакција на проектот за нова фасада и доградба на Градскиот трговски центар со кој целосно би се уништила архитектурата на објектот, како и неговата урбанистичка улога на „улица“ низ централното градско јадро.