Премиерот Зоран Заев засега има назначено 8 посебни советници во неговиот Кабинет. НОВА ТВ од Владата побара информација кои се избраниците на Заев кои ќе го советуваат за прашања од различни области. Тоа се следните лица:
Посебен советник – Правда Тања Чачарева – Илиевска
Посебен советник – Култура Цветанка Ласкова
Посебен советник- Администрација – Љупка Цветкова
Посебен советник- Односи со јавност – Марјан Забрчанец
Посебен советник- Надворешна политика – Дане Талески
Посебен советник за евроинтеграции – Бојан Маричиќ
Посебен советник за земјоделство – Ленче Николовска
Посебен советник за екологија – Драган Јованов
Според Законот за вработените во јавниот сектор, премиерот има право да вработи по еден посебен советник за секој ресор на Владата. Тоа значи дека Заев ќе именува и други соработници, но оттаму не ни одговорија конкретно кој е максималниот број на посебни советници што има право да ги ангажира Премиерот.
„Посебните советници се вработени преку оглас, именувани како функционери но не им следува право на апанажа. Овие лица имаат мандат кој е врзан со мандатот на именуваниот функционер каде што се вработени, односно со завршување на нивниот мандат се прекинува и нивниот работен однос. Висината на платата на посебен советник е во рамка на државен службеник“, велат за НОВА ТВ од Владата.
На прашањето на НОВА ТВ колку советници имал поранешниот премиер, Никола Груевски, одговорија дека во одредени временски периоди, бројот на советници и посебни советници на претходниот премиер се движел и до 86 вработени лица.
Премиерот со најмногу советници, Иванов и Џафери имаат право на пет
Согласно членот 22 од Законот за вработените во јавниот сектор, бројот на посебни работни места на советниците не може да биде поголем од:
-пет работни места на посебни советници во Кабинетот на претседателот на Република Македонија,
-пет работни места на посебни советници во Кабинетот на претседателот на Собранието на Република Македонија,
– едно работно место на посебни советници во кабинетите на потпретседателите на Собранието на Република Македонија,
– по едно работно место на посебен советник за секој ресор на Владата на Република Македонија во Кабинетот на претседателот на Владата на Република Македонија,
– три работни места на посебни советници во кабинетите на замениците на претседателот на Владата на Република Македонија,
– три работни места на посебни советници во кабинетите на министрите кои водат министерства со над 100 вработени,
– три работни места на посебни советници во кабинетот на генералниот секретар на Владата на Република Македонија,
– две работни места на посебни советници во кабинетите на министрите кои водат министерства со помалку од 100 вработени и
– едно работно место на посебни советници во кабинетите на министрите без ресор.