Основниот суд во Прилеп го осудил градоначалникот на Прилеп, Марјан Ристески на парична казна од 36.900 денари или алтернативна мрка од условна казна затвор во траење од три месеци, објави Публикум.
Како што пишува медиумот прилепскиот градоначалник е задолжен на име надомест на штета на општината да ѝ исплати 238.750 денари.
Градоначалникот Ристески е прогласен за виновен затоа што во периодот од 18.07.2015 година па до 6.10.2016 година како службено и одговорно лице во Општина Прилеп, со несовесното постапување во вршењето на своите овластувања и должности не обезбедил правилна и законита заштита на сопственоста на општината, односно не ја осигурил од штети зградата на Општина Прилеп. Со тоа, градоначалникот Ристески на Општина Прилеп ѝ нанесол штета во износ од 238.750 денари, која настанала за време на одржаните протести од група граѓани во текот на месеците април, мај и јуни 2016 година.
Од општината денеска испратија соопштение со реакција на градоначалникот Ристески во која тој вели дека пресудата на судот е неважечка и незаконска
„Основниот суд Прилеп без да спроведе постапка во која што би ги соочиле аргументите, го потврди налогот доставен од ОЈО Прилеп, иако истиот е апсурден и на него имам изјавено приговор, така што одлуката на судот се смета како воопшто да не била донесена. Убеден сум дека по спроведувањето на постапката во судот ќе се докаже дека сум целосно во право. Штетата на општинската зграда ја предизвикаа други лица за време на шарената револуција, од кои треба да се бара одговорност. Јас како градоначалник на Општина Прилеп имам обезбедено заштита на сопственоста на Општината. Во Општината функционира служба за обезбедување на општинската зграда и има видео надзор за набљудување на околината на зградата, со што во целост го имам применето членот 50 ст.1 т.15 од Законот за локалната самоуправа“, се вели во реакцијата на градоначалникот Ристески.
Во соопштението пишува и дека цел на овие случувања е дискредитирање на неговата личност, но и да се стави дамка на работењето на општината и на спроведените проекти.