Министерот за надворешни работи на Србија, Ивица Дачиќ денеска во интервју за ТВ Пинк рече дека одлуката на Србија да го повлече персоналот на амбасадата во Македонија всушност е порака дека сѐ знаат, „и што се договарале и што договориле“, а тоа, како што рече, е нешто што не им се прави на пријатели.
„Тоа што они ќе ги прислушуваат нашите телефони не е толку страшно, зошто тоа што јас го зборам по телефон го кажувам и јавно, но, тоа може да има тешки последици по нашите државни интереси, бидејќи целта на таквото дејствување е да се дојде до секакви лажни обвинувања дека од Србија се заканува опасност и дека Србија сака да инсценира некои судири во Македонија“, рече Дачиќ.
Тој рече дека Србија никогаш ништо не презела против Македонија и дека ќе се обидат да ја смират ситуацијата.
„Бевме коректни и конструктивни и никогаш нашата земја не се мешала во нејзините внатрешни работи. Прашањето на името за Македонија е исто како и прашањето на Косово за нас, но едноставно немаше реципроцитет. Ние им набивме прст во око на нашите пријатели Грци кои не го признаа Косово“, вели Дачиќ.
Тој најави дека Александар Вучиќ ќе разговара со Зоран Заев и вели дека тоа е многу важен разговор, а истото ќе го направи и премиерката Брнабиќ, бидејќи сакаат да се нормализираат односите.