Од 1.октомври од понеделник до сабота од 14 до 16 часот ќе има евтина струја, вечерните часови од 22 до 7 наутро и недела остануваат како термин за трошење на поевтина струја, најавија денеска премиерот Зоран Заев и министерот Кочо Анѓушев..
Мерката ќе чини осум милиони евра, пари кои, како што рече Заев, ќе се вратат кон граѓаните, а се овозможени од “домаќинското работење“ на МЕПСО и ЕЛЕМ.
„Ја вративме евтината струја за да го олесниме животот на граѓаните. Во Македонија може да се живее добро, ако заедно се заложуваме. Оваа мерка води кон живот за секого во Македонија“, рече Заев, кој посочи дека оваа мерка сепак повеќе од корист ќе им биде на посиромашните граѓани во државата.
Вицепремиерот за економски прашања, Кочо Анѓушев рече дека мерката ја донеле во консултации со сите чинители во енергетските процеси и по претходно направена целосна анализа.
„Заштедите во МЕПСО и ЕВН, односно нивното домаќинско работење ќе биде пренесено како бенефит за граѓаните“, рече тој додавајќи дека ЕВН нема да добие никаква субвенција за оваа мерка, туку парите ќе се обезбедат преку кратење на непродуктивните трошоци.
Тој потенцираше дека мерката не е временски детерминирана и таа нема да придонесе за зголемување на цената на струјата, бидејќи таа зависи од нејзиното движење на берзата.