Владата на Република Македонија го поздрави најновиот извештај изготвен од експертската група со која раководи Рајнхард Прибе, објавен денеска и на овој втор извештај гледа како на продолжение на извештајот на Прибе во 2015 година.
– Денешниот извештај кој се однесува на периодот јуни 2015 – јуни 2017 беше изготвен во целосна соработка на сите државни институции со експертската група предводена од Рајнхард Прибе. Го поздравуваме заклучокот на групата наведен во Извештајот за позитивната промена во политичкиот контекст и согледаната поголема посветеност од страна на институциите за проактивно решавање на политичките предизвици и преземање одговорност. Сметаме дека Извештајот на Прибе објавен денеска дава реална слика за системските и долгогодишни предизвици кои оваа Влада ги наследи по преземањето на власта во јуни 2017 година, затекнувајќи „заробена држава“, се вели во ставот на Владата.
Во соопштението, Владата потенцира дека целосно се согласува со констатацијата дека во периодот 2015-2017 година многу малку работи се подобрени во областите од ззвештајот, и дека тоа значи многу изгубено време за Македонија.
„Токму во првите 100 дена од работењето, новата Влада успеа да ги согледа овие проблеми и, загрижена за досегашното загубено време и шанси, изработи реформски План 3-6-9, кој веќе опфаќа дел од проблемите утврдени во новиот Извештај на експертската група на Прибе, и отвара пат за нивно решавање. Истакнуваме дека Извештајот на Прибе објавен денеска ќе го искористиме како насока за надградување и подобрување на Планот 3-6-9, како и за определување на приоритетните мерки за наредниот период“, порачуваат оттаму.
Највисокиот извршен орган на Република Македонија порачува дека целта е да се решаваат проблемите на суштински начин, а Европската комисија со верификување на напредокот да овозможи обновување на безусловна препорака за почеток на преговорите со ЕУ и скорешно отварање на преговарачкиот процес за членство на Македонија во ЕУ.