Во општина Ново Село утре ќе се одржи референдум на кој жителите ќе се изјаснат дали се за или против изградба на рудникот за бакар и злато Иловица. Право на глас имаат 11.432 граѓани, а за да биде успешен референдумот на 20-те гласачки места треба да се изјаснат најмалку 5.720 жители со право на глас.
Од компанијата „Еуромакс“, која има добиено концесија за експлоатација, а веќе десетина години работи на проектот за бакар и злато кај Иловица, тврдат дека рудникот се гради согласно сите европски нормативи за заштита на животната средина.
Екологистите се надеваат дека жителите на Ново Село ќе имаат поголем демократски капацитет и ќе излезат на референдумот.
„Ние дефинитивно остануваме на ставот дека во Струмичко не е потребен рудник бидејки ќе се уништи земјоделието, сточарството во подогражденскиот предел, а постои опасност од и нарушување на целиот биодиверзитет. Рудникот на смртта во Иловица ќе биде напад врз струмичката котлина и врз самите нас, што досега во нашата историја се нема случено! Тоа ќе биде геноцид во невидени размери“, вели Костадин Ристоманов активист од здружението „Здрава котлина“.
За рудникот за злато Иловица на Огражден пред две недели се изјаснуваа жителите на општина Босилово, но референдумот пропадна оти на гласачките места излегоа едвај 32 отсто од запишаните гласачи со право на глас и не беше исполнет законскиот цензус од 50 отсто плус еден. Утрешниот референдум во Ново Село е последен во Југоистокот, каде беа издадени околу 80 концесии за детални геолошки истражувања и концесии за експлотација. Референдумите во Гевгелија, Богданци и Дојран референдумите беа успешни и жителите кажаа не за рудници, додека во Валандово и Босилово пропаднаа поради недоволна излезност.