Севернокорејскиот лидер Ким Јонг Ун му одговори на американскиот претседател Доналд Трамп на заканите содржани во говорот во вторникот на Генералното собрание на Обединетите нации.
„Сега размислувам каков одговор би можел да очекува кога си дозволи да изговори такви ексцентрични зборови. Јас сигурно и дефинитивно ќе го скротам ментално пореметениот со оган“, ја пренесува изјавата на Ким, официјалната севернокорејска централна новинска агенција.
Но она што американските медиуми посебно го истакнаа од изјавата на севернокорејскиот лидер е зборот „dotard“, за кој побараа објаснување во Merriam-Webster речникот, каде тој се дефинира како „лице во состојба на сенилен распад“.
Трамп претходно објави нови санкции за поединци и компании кои соработуваат со Северна Кореја.
Мерките имаат за цел, како што рече, попречување на севернокорејските трговски мрежи преку удар врз секој ентитет кој работи со таа земја.
– Странските банки имаат јасен избор: работење со САД или овозможување на трговијата со одметничкиот режим во Северна Кореја, изјави Трамп кој во вторникот од говорницата на Генералното Собрание на ОН и се закани на таа земја со „целосно уништување“.
Европската унија ги поддржа новите санкции, а според дипломатски извори, ќе биде воведена забрана за сите европски фирми да извезуваат нафта во Северна Кореја.