Кривичниот суд на барање на одбраната ги одби телефонските разговори, односно, „бомбите“ како докази во случаите „Тендери“, „Топлик“ и „Тортура“, за коишто Специјалното јавно обвинителство поднесе обвиненија.
За барањето на одбраната телефонските разговори да се издвојат од списите на предметот како доказ прибавен на незаконски начин одлучуваше Советот за оценка на обвинителен акт на Основниот суд Скопје 1 – Скопје.
Во случајот „Тендери“ обвинета е министерката за култура за малверзации со тендерот за извршување градежни работи во Музејот на ВМРО, од проектот „Скопје 2014“.
За случајот „Топлик“ осомничени се шест лица од Министерството за транспорт и врски за изградба на „Сончев град“. „Тортура“ се однесува на апсењето на поранешниот министер за внатрешни работ, Љубе Бошкоски.
Против овие неправосилни решенија, дозволено е право на жалба во рок од 3 дена до Апелациониот суд – Скопје.
Апелација минатата недела ги прифати „бомбите“ како доказ за случајот „Триста“, а на 4 август и за „Шамарите во Центар“.
Во случајот „Триста“ се работи за кривично дело – злоупотреба на службената положба и овластување, а постои основано сомнение дека е извршено од страна на помошник министер во Министерството за внатрешни работи, во врска со јавна набавка што се однесува за 300 возила.
Во случајот „Шамарите во Центар“ Никола Груевски, Миле Јанакиевски, Даниела Рангелова и уште 11 лица се обвинети за насилството во општина Центар откако на изборите во 2013 победи Андреј Жерновски.
Во „бомбите“ што ги објавуваше премиерот Зоран Заев, како лидер на опозицијата, објавен беше разговор во кој тогашниот премиер Никола Груевски нарачува некој да му „врзе три-четири шамари“ на градоначалникот на Општина Центар, Андреј Жерновски.