Наставниците и учениците од некои училишта во Каталонија се организираат за да ги подготват училиштата за гласањето за референдумот за независност од Шпанија в недела, што Мадрид вети дека ќе го спречи и притоа испрати голем број полициски сили.
Весникот “Ла Вангардија” пишува дека на социјалните мрежи се испраќаат кодирани пораки за да се направат подготовките.
Стотици наставници се собраа вчера во седиштето на регионалната влада, извикувајќи “Ние ќе отвориме” и “Ние ќе гласаме”.
Владата на Каталонија соопшти дека може да прогласи независност од Шпанија во рок од 48 часа по гласањето.
Мадрид: Нема да има референдум на 1. октовмри
На прес-конференција, владиниот портпарол Иниго Мендез де Виго ја потврди решеноста на Мадрид да го блокира гласањето.
-Нема да има референдум на 1 октомври. Овој сецесионистички процес е нелегален уште од самиот почеток. Должност на правната држава е да спречи тоа да се случи, рече тој.
Илјадници национални полицајци во моментов се наоѓаат на двата бродови во пристаништето во Барселона, чија цел е да спречат гласање и да го гарантираат шпанскиот суверенитет над Каталонија, јавуваат агенциите.
Каталонија со 7,5 милиони луѓе на североистокот на Шпанија има свој јазик и култура и висок степен на автономија. Но, таа не е признаена како посебна нација од страна на шпанската држава.
Каталонските лидери побараа помош од Европската унија, велејќи дека Мадрид ги поткопува демократските вредности на Унијата. Во петокот претседателот на Европскиот парламент Антонио Тајани рече дека ќе работат на изнаоѓање политичко решение.
Тој за италијанската новинска агенција Анса изјави дека референдумот е нелегален, но дека владата во Мадрид и надлежната администрација во Каталонија треба да постигнат решение за ова прашање.
Но, шпанскиот министер за здравство Долорес Монтсерат во петокот го отфрли дијалогот за ова прашање.
Улогата на наставниците во кампањата
Наставниците и учениците одиграа голема улога во кампањата за референдумот, што го поттикна Мадрид да му се закани на Министерството за регионално образование со правни дејства во врска со нивниот наводен неуспех да ги заштити малолетните лица, објави Ел Мундо.
Студентите и ги напуштија часовите за да се приклучат на митинзите.
Според каталонскиот весник “Ла Вангардија”, активистите за референдумот планираат да ги задржат сите училишта отворени во текот на целиот викенд, а постојат ин планови да се користат трактори за блокирање на безбедносните сили доколку се обидат да ги затворат просториите.
Има и веб-страница – escolesobertes.eu (отворени училишта), каде граѓаните може да се информираат кои училишта се отворени.