Министерството за внатрешни работи преку соопштение денеска информираше дека презема мерки за расчистување на тепачката која се случи вчера на улицата Гвадалахара во населбата Шуто Оризари, а во која повреден беше Елвис Бајрам, градоначалник и кандидат за градоначалник на оваа општина од партијата Сојуз на Ромите.
Од МВР велат дека идентификувани се и повикани на разговор пет лица кои учествувале во тепачката и во постапка е прибирањето докази за понатамошно постапување.
„Министерството за внатрешни работи најостро ги осудува сите облици на насилство, а особено во текот на изборната кампања. Изборниот процес е наменет за претставување на кандидатите и нивните програми и министерството смета дека тоа е единствениот начин преку кој граѓаните треба да бидат запознаени со учесниците во изборниот процес. Секаков обид за нарушување на демократскиот изборен процес и загрозување на безбедноста на граѓаните ќе биде соодветно санкциониран“, пишува во соопштението на МВР.
Бајрам,вчера попладне бил нападнат и повреден додека одржувал средби со граѓаните како дел од предизборната кампања.
Од крвничкото тепање Бајрам паднал во безсознание. Насилниците побегнале, а екипа на Брзата помош констатирала тешки повреди и тој веднаш бил одвезен во Градската општа болница „8-ми септември“.
Директорот на ГОБ„8-ми септември“ вели дека Бајрам има осекотина од 8 сантиметри која е сошиена, нема скршеници, нема потрес и нема други повреди.
Тој за време на нападот бил на митинг, кога некој одзади го удрил со метална шипка. Бајрам има повреда на челото и на дел од главата.
Бајрам зад себе има два градоначалнички мандати во Шуто Оризари, а на овие локални избори се бори за третиот.