Жителите на скопско Стајковци, кое спаѓа под општина Гази Баба, денеска гласаат за избор на нов градоначалник, со надеж дека она што го ветиле кандидатите во предизборната кампања ќе го остварат. Некои се оптимисти, други пак се песимисти дека ќе биде подобро.
Што очекуваат граѓаните од новиот градоначалник?
„Очекуваме каналот да ни го направи. Јас имам 55 години и секој градоначалник ни ветува дека ќе биде направен каналот, ама ете до сега не е уреден“, ни изјави жител од ова скопско село.
„Секој пат очекуваме подобро“, вели граѓанин на Стајковци.
„Без пари не се прави ништо, џабе ветувања. Уште една поплава ако не фати и се ќе биде во ред“, иронично ни изјави еден жител на Стајковци.
Додека екипата на НОВА ТВ беше во основното училиште „Свети Кирил и Методиј“ таму дојде и италијанскиот амбасадор во земјава, Карло Ромео, со цел да види како тече гласањето. Набљудувачите и членовите на избирачките одбори рекоа дека дотогаш немало никакви проблеми, ниту нарушување на избирачкиот процес.
Во Арачиново во набљудувачка мисија дојдоа претставници на ОБСЕ за да видат како тече гласањето. Таму се гласа во училиштето „Ѓерѓ Кастриот Скендербег“ каде жителите во голем број излегуваат на гласање и се чекаше и по 15-тина минути за да се оствари гласачкото право. Граѓаните велат дека како и на секои избори, гласаат оти се надеваат дека новата локална власт ќе стори нешто за општината и за подобар живот на Арачиновци.
„Гласањето тече мирно, како на гробишта“, вели жител на Арачиново.
„25 години ние се надеваме и не знам дали уште така ќе продолжи. Се надеваме дека ќе има промени на подобро“.
„Уморни сме од ветувања. Треба уште да се работи“, вели еден Арачиновец.
Во Арачиново има 9366 гласачи во избирачкиот список. Излезноста до 13 часот според податоците на Државната изборна комисија беше 33,97 проценти.