Информатичарите од Специјалното јавно обвинителство, како дел од тимот истражители во предистражната постапка за злоупотреби со АКМИС системот во Основниот суд Скопје 1, за кои што е осомничен експретседателот Владимир Панчевски, денеска пак се вратиле кај в.д. претседатаелот Стојанче Рибарев, објави СДК.МК.
Претседателот на судот им овозможил дополнително да вадат докази од главниот компјутер.
Од СЈО, во врска со оваа предистражна постапка, рекоа дека податоците од одземените компјутери на Панчевски и на Рибарев, кој всушност е претседателски компјутер и ги содржи сите движења и распоредувања на стотици илјади предмети во овој суд, уште од поставувањето на АКМИС во 2010 година, сè уште се анализираат во МВР. Се уште се анализирале и податоците од личниот компјутер на осомничениот Панчевски.
Од Министерството денеска потврдија дека записникот на работната група на Министерството за правда, која вршеше ревизија на АКМИС системот е готов.
Оттаму посочуваат дека деновиве министерот за правда Билен Саљији ќе ја свика работната група на брифинг, а потоа Министерството ќе изготви извештај што ќе биде презентиран пред јавноста.