Вицепремиерот за евроинтеграции Бујар Османи во емисијата „Патот кон“ на „Алсат-М“ со Арта Тахири, Билјана Секуловска и Абдула Ахмети изјави дека разликите околу името со Грција ќе бидат решени наскоро. Тој тврди и дека Македонија може да избегне референдум благодарение на решение кое би произлегло од промената на името на аеродромот Александар Велики и на останатите стратешки точки кои досега Грција ги смета за иредентистички.
„ И јас ви гарантирам дека доколку продолжиме да ги реализираме реформите со оваа динамика, да го затвориме прашањето на името ќе добиеме уште поголема поддршка од граѓаните бидејќи граѓаните ја бараат Македонија во НАТО и во ЕУ“, рече Османи.
Сепак, главниот проблем е во прашањето на името, како ќе се затвори, со референдум, како ќе се реши?
„Мислам дека овие избори беа референдум. На овие избори ние го најавивме решавањето на името“, рече Османи.
Ова значи дека нема да има референдум за името?
„Зар не беа референдум овие избори? Граѓаните ни ја дадоа пораката, вие сте храбри, имате јасна визија каде треба да ја водите државата во наредните години…“, рече Османи.
Откако заврши емисијата, Османи на својот профил на социјалната мрежа „Фејсбук“ напиша:
„Жестока но плодна дебата во емисијата „Руга Дрејт“ на Алсат-М, кај Арта Тахири, заедно со Билјана Секуловска и Абдула Мехмети. Во жестината на дебата, некои работи не ги објаснив доволно прецизно, па дозволете да бидам прецизен. Владата доби доволно политичка поддршка за да може храбро да влезе и во решавање на спорот за името. Но, тоа не значи дека евентуалното взаемно прифатливо решение би било донесено без за тоа да бидат прашани граѓаните, т.е., без референдум“, напиша Османи.