Уставниот суд не може да врати еднаш избришана одредба, рече во интервју на емисијата „360 Степени“ на „Алсат“ поранешната судијка во Уставниот суд, Наташа Габер-Дамјановска.
Таа зборуваше за помилувањата донесени од претседателот Ѓорге Иванов и членот 11 од Законот за помилување на кој се повика тој.
„Основниот текст на законот е изгласан во 1993 година и таму го има тој член 11 на кој се повикаа двајца претседатели, Борис Трајковски и Бранко Црвенковски, па во 2009 година беа донесени измени со кои беше избришан членот, а беа додадени и 4 кривични дела кои не можат да бидат предмет на помилување. Потоа со иницијатива од охридски адвокат се побара укинување на сите измени и дополнувања од 2009. Тоа беше сторено од Уставниот суд, по што се веруваше дека ако се укинат сите измени и дополнувања, се враќаме на претходната состојба, од 1993, во која членот постои. Но тоа така не може да биде. Уставниот суд веќе има неколку такви примери во својата пракса, во која експлицитно кажува дека еднаш избришана одредба не може да ја врати Уставниот суд во поредок, туку единствено кое може е Собранието“, рече Габер-Дамјановска.
Таа додаде дека ако претседателот Иванов сега реши да помилува некого и се повика на член 11 од Законот за помилување, тоа ќе биде залудно, зашто тоа е непостоечка одредба.
Таа зборуваше и за изборот на судија од Македонија во Судот во Стразбур и дека со нетрпение очекува да излезе вистината на виделина за изборот на Јован Илиевски во Европскиот суд за човекови права.
„Јас не можам тоа да го објаснам, заради тоа што навистина е реткост, комисијата којашто ги прави интервјуата да предложи едно име, а некое друго име да биде изгласано од страна на Парламентарното Собрание. Нашиот случај, на Република Македонија, испадна дека е еден од тие исклучоци. Други примери на коишто можам да се сетам беа примерите со Словенија. Судијката којашто беше тогаш предложена од страна на комисијата да биде гласана од Парламентарното Собрание на Советот на Европа, беше цел на организирана кампања во која се образложуваше зошто таа не би требало да го заземе тоа место. Без да навлегувам дали тој што ја правел кампањата за конкретната судијка бил во право или не, мислам дека ако се направи паралела со овој наш случај, јас немам објаснување зошто се случи тоа така во Парламентарното Собрание – рече Габер-Дамјановска.