Денеска во основните училишта во Република Македонија се одржа одделенски час посветен на здравиот начин на исхрана и квалитетот на храната во училиштата, а по тој повод, министерката за образование и наука проф. д-р Рената Дескоска, заедно со претставникот на УНИЦЕФ Бенџамин Перкс, присуствуваа на час во ОУ „Аврам Писевски“ во село Бардовци.
Mинистерката Дескоска го отвори прашањето за квалитетот на храната во училишта, односно непочитувањето за стандардите за исхраната и за оброците во основните училишта и најави зголемена контрола на храната во училиштата.
-Во досегашните извештаи доставени до МОН, е наведено дека исхраната на учениците со целодневен престој не одговара на стручните препораки и норми, односно дека генералните препораки за енергетски внес се почитувани, но внесот на нутритивно богата храна како овошје и зеленчук, како и млечни производи е исклучително мала. Тоа значи дека се јаде храна богата со шеќери, калорична храна, но не здрава и квалитетна храна. Ова е проблем кој се проткајуваше низ годините, но време е да ставиме крај на лошите практики, изјави министерката Дескоска.
Министерката Дескоска најави дека се планираат законски измени, со кои ќе бидат предвидени санкции за непочитување на Правилникот за стандардите за исхраната и за оброците во основните училишта.
-Правилникот за стандардите за исхраната и за оброците во основните училишта не се почитува и истиот не е обврзувачки поради тоа што не постојат контролни механизми за негово спроведување. Затоа, Министерство за образование и наука ќе му даде обврзувачка сила на овој правилник, а школите и директорите ќе мора да го почитуваат правилникот и да внимаваат при одобрувањето и правењето на менијата, односно да внимаваат на квалитетот на храната и здравјето на учениците, рече Дескоска, најавувајќи законски измени со кои ќе се предвидат санцкии за непочитување на Правилникот за исхрана. Ќе бидат предложени поригорозни казнени мерки за оние училишта кои не го почитуваат правилникот со кој е утврдено точно какви хранливи состојки треба да консумираат учениците.
-Така, ќе се осигураме дека учениците ќе јадат квалитетна и здрава храна, потенцираше Дескоска.
Промовирањето и едукацијата на правилната исхрана на учениците од основните училишта во земјава има за цел да се изградат добри навики во исхраната почнувајќи од раното детство.
Најголемиот глобален час е иницијатива на светско ниво за запознавање на децата и младите со Глобалните цели за одржлив развој и за поттикнување нивно активно учество во остварувањето на овие цели.