Војската на Зимбабве соопшти денеска дека ги држи во притвор претседателот на земјата Роберт Мугабе и неговата сопруга Грејс, како и дека ги обезбедува владините згради и патролира низ улиците на главниот град Хараре.
Ситуацијата се менува секоја минута и засега не е јасно дали се работи за државен удар или Мугабе е во притвор заради неговата безбедност
Претходно, војниците го уапсија и министерот за финансии Игнатиус Чомбо, откако ја зазедоа власта во обид да се справат „со криминалците околу претседателот Роберт Мугабе кои им причинуваат социјално и економско страдање на луѓето“, соопшти владин извор.
Се истакнува дека Чомбо е водечка фигура во таканаречената Г40 фракција во владејачката партија ЗАНУ ПФ, која ја води Грејс Мугабе, сопругата на 93 годипниот претседател, која сака да го наследи.
Акцијата на армијата следи откако Мугабе го разреши заменик-претседателот Емерсон Монангава, поради спорот околу наследувањето.
Воени возила блокираа улици пред Парламентот откако армиски генерали демантираа дека е извршен државен удар.
Во обраќање на националната телевизија тие наведуваат дека нивна цел се „криминалци“ блиски на претседателот Роберт Мугабе.
Според западни медиуми, војници пренасочуваат автомобили кои се движат во близина на Парламентот додека армиски возила се стационирани и пред канцеларии на владејачката партија ЗАНУ-ПФ во главниот град Хараре.
Во меѓувреме влијателниот лидер на воените ветерани кои водеа војна за независност на Зимбабве, Крис Муцванга денека ја повика Јужна Африка и другите држави од југот на Африка, но и Западот повторно да стапат во контакт со Зимбабве.
Американската амбасада во Зимбабве соопшти дека денеска ќе биде затворена, а на својот персонал и своите државјани во земјата им порача да останат во своите домови поради политичката нестабилност.