Стефан Спасов, Григор Јовановски и Александар Михајловски, синовите на актерите Драган Спасов – Дац, Владо Јовановски и Тони Михајловски, се дел од актерската екипа во претставата „Ничија земја“, која во петокот беше откажана во знак на протест против одлуката за притвор на Владо Јовановски, осомничен за насилните протести на 27. април.
Стефан Спасов и синот на Јовановски, Григор Јовановски, се студенти на Факултетот за драмски уметности, а Александар Михајловски е вработен во Театар комедија. Сите тие играат во претставата „Ничија земја“, покрај актерите Сашко Коцев, Никола Ацески, Гораст Цветковски, Александар Микиќ, Славиша Кајевски, Александар Ѓорѓиески, Борче Начев, Оливер Митковски, Камка Тоциновски, Ненад Анѓелковиќ, Кристина Гијева, Филип Миленкоски, Александар Иваноски, Марија Кондовска и Томе Станковски.
Во петокот публиката во Македонскиот народен театар не ја одгледа претставата, туку само го слушна извинувањето на актерскиот тим за нејзино одложување. Пред полната тие соопштија дека претставата нема да ја играат во знак на протест за 30-дневниот притвор на нивниот колега Владо Јовановски.
В.Д. директорот на МНТ, Драган Спасов – Дац, за НОВА ТВ изјави дека во наредниот период ќе биде формирана дисциплинска комисија која ќе одлучи дали и какви казни ќе има за актерите кои одбија да ја одиграат претставата.