Собранието на Република Македонија на првата наредна седница треба да ги констатира оставките на членовите на Државната изборна комисија.
Овој состав на ДИК кој имаше мандат од склучувањето на Пржинскиот договор, а со траење до 2020 година, се повлекува по критиките во јавноста за делењето високи бонуси.
На интернет-петиција со која се бараа оставки од деветмината членови на ДИК се потпишаа над 5.000 лица.
Сите членови на ДИК, освен најновиот од партијата БЕСА, Ермира Асани-Салија, се повлекоа од функциите во овој највисок изборен орган, откако пред една недела американскиот амбасадор обзнани дека членовите на ДИК си поделиле високи надоместоци за својата работа за време на локалните избори и последните неколку изборни циклуси.
Оставка прв завчера поднесе претседателот на комисијата, Александар Чичаковски, кој на таа позиција беше назначен од редот на експертите, по што следеа оставките од членовите од СДСМ Виолета Дума и Игор Милев.
Нив вчера првично со оставки им се придружија и Субхи Јакупи, предложен од ДУИ, и потпретседателот на ДИК, Реџеп Прекопуца, како и членот Атанас Урумов, кои доаѓаат од редот на експертите.
Последни оставка поднесоа членовите на ДИК од редовите на опозициската ВМРО-ДПМНЕ, Силвана Бонева и Сашо Срцев.
По констатирањето на оставките, во рок од три дена претседателот на Собранието од политичките партии од власта и од опозицијата треба да побара предлози за членови на ДИК. Доколку тоа не се случи, собраниската Комисија за прашања на изборите и именувањата ја има надлежноста да предложи нови имиња. Собранието треба да распише и оглас за изборот на претседателот и членовите на ДИК.
За изборот на тројцата непартиски членови на ДИК, експерти, треба да се согласат сите партии.
Од ВМРО-ДПМНЕ и официјално најави дека ќе ја бојкотира работата на Собранието, сѐ додека од притвор не се ослободат нивните шестмина пратеници кои се осомничени за нередите во Собранието на 27 април.
Државната изборна комисија има девет члена, претседател, потпретседател и седум членови. Шестмина се избираат на предлог на партиите, а тројца се од редот на експертите. Членовите на ДИК ги избира Собранието со двотретинско мнозинство. Мандатот им е пет години, со можност за реизбор.