Финансирањето на медиумите е една од предистражните постапки која ја отвори Специјалното јавно обвинителство. СЈО истражува колку пари се слевале во медиумите блиски до претходната власт. Голем дел од парите доаѓале од Владата како реклами, но кеширале и општините, како и фирми блиски до тогашната власт. На сметките на телевизиите легнале милиони евра, пари со кои беше платена пропагандата на ВМРО-ДПМНЕ. Кога падна Никола Груевски, почна падот и на дел од телевизиите. Повеќе нема реклами, нема пари за плати на вработените, а некои од нив ги бројат деновите до згаснување.
Денеска на полноќ истекува рокот за две регионални телевизии, кои ако не продолжат да зрачат програма ќе почне постапка за одземање на нивната дозвола за работа. Станува збор за ХДТВ Мега, која се гледа во Битола, Прилеп, Крушево, Демир Хисар, Ресен, Кичево, како и ХДТВ Канал Плус која зрачи на територијата на Штип, Кочани, Пробиштип, Македонска Каменица, Делчево, Берово, Виница. Овие две телевизии пред точно 30 дена, на 17 ноември, беа исклучени од мрежата на Оне.Вип преку која емитуваа програма поради неподмирени обврски кон телекомуникацискиот оператор.
ХДТВ Мега и ХДТВ Канал Плус се сопственост на ист газда, скопјанецот Горан Митев. Пред затворање е и регионалната телевизија ТВ О2 која емитува програма на територијата на Охрид и Струга, а сопственик е Драган Митковски од Скопје.
Овие телевизии почнаа со работа кон крајот на 2014 година. За три години остварија приходи од неколку милиони евра, а сега по падот од власт на ВМРО-ДПМНЕ, неизвесно е нивното опстојување.
Од Агенцијата за аудио и аудиовизуелни медимски услуги за НОВА ТВ велат дека доколку не продолжат да емитуваат програма, од утре почнува постапка за одземање на дозволата за работа. Дополнителниот рок кој ќе го добијат сопствениците за да го платат надоместокот кон Оне.Вип во износ од 20.000 евра за една лиценца е 15 дена. Ако и дотогаш не ги платат давачките, овие регионални телевизии ќе згаснат.
Сите шест телевизии беа купени во ист ден
Шест регионални телевизии во 2013 година беа купени во ист ден од тројца бизнисмени. Трите фирми кои ги купуваат телевизиите се основани во ист ден, на 17 мај 2013, а шесте телевизии се купени во ист ден 28 мај 2013.
Горан Митев за 36.000 евра ги купува ТВ Боем и ТВ Д1, кои потоа ги преименува во ХДТВ Мега и ХДТВ Канал Плус. Митев од 2009 до 2012 година работел во Државната лотарија. Оттаму заминува на позицијата извршен директор на фудбалскиот клуб Вардар, каде што останува сѐ до февруари 2014 година. Митев беше и директор на младинските школи во фудбалскиот клуб Вардар.
Вториот сопственик е Емил Парнаџиски, кој за 35.000 евра ги купи Канал 3 Дебар и ТВ ВТВ Валандово. Валандовската ја преименува и таа зрачи под името Телеканал А1. Парнаџиски е вработен во државната компанија за пренос на струја МЕПСО.
Независна ТВ, сега ТВ О2, и тетовската Менада ТВ ги купи Драган Митковски за 47.000 евра. Драган Митковски е основач на сметководственото биро „Митковски ММ“ и актуелен потпретседател на Сојузот на стопански комори. Тој бил потпретседател на фудбалскиот клуб Македонија Ѓорче Петров, а бил е претседател на комисијата за финансиско работење на Фудбалската федерација на Македонија (ФФМ).
Владини реклами и пари од бизнис партнерите на ВМРО-ДПМНЕ
Според официјалните податоци на интернет страната на Агенцијата за аудио и аудиовизуелни медиумски услуги, телевизијата ХДТВ Мега во 2014, 2015 и 2016 година имала приходи од 1 милион и 71.000 евра. Официјалниот старт на телевизијата е 13 декември 2014 година, само 18 дена пред крајот на годината, а веќе прикажала приходи од 442.000 евра. Во 2015 Мега инкасирала 366.000 евра, а лани 263.000 евра.
Сопственикот Горан Митев ја поседува и ХДТВ Канал Плус, а таа телевизија за три години покажува приходи од 894.000 евра.
Односно, Митев од двете телевизии остварил приходи од 1.9650.000 евра.
Најголем дел од приходите се владини реклами, реклами од локалните власти, но и пари кои се слевале од фирми блиски до претходната власт, кои сега се под истрага на Специјалното јавно обвинителство.