Извршниот комитет на ВМРО-ДПМНЕ нема да дискутира за иницијативата на повеќемина истакнати актуелни и поранешни пратеници и функционери на партијата за одлагање на партискиот конгрес кој е закажан за 22 и 23.декември во Валандово.
„Извршниот комитет дискутираше во врска со јавно објавената иницијатива од страна на повеќемина актуелни и поранешни функционери. Иницијативата објавена во медиуми не доби поддршка од Извршниот комитет кој одлучи истата да не ја предложи на денешната седница на Централниот комитет на партијата. Извршниот комитет ја разгледа и информацијата околу подготовките за одржување на Вонредниот 16 Конгрес кој ќе се одржи на 22 и 23 декември во Валандово“, информира ВМРО-ДПМНЕ.
На вчерашната седница на ИК на ВМРО-ДПМНЕ, тие ги осудиле „нехуманите услови во кои власта ги држи уставобранителите кои политички беа притворени со монтирани обвиненија за тероризам“.
„Ваквиот однос на властите кон притворените е директно кршење на човековите права и газење на нивното достоинство и претставува уште еден доказ дека не станува збор за правен случај, туку за класична политичка одмазда кон неистомисленици и луѓе кои не се плашеле гласно да го кажат своето несогласување со актуелните политики“, се вели во соопштението на партијата.
Воедно ИК одлучил дека партијата мора да продолжи да презема чекори со кои ќе го привлече вниманието на домашната и меѓународната јавност за како што сметаат, недемократското и репресивно однесување на хунтата на власт и злоупотребата на институциите и целокупниот државен апарат, вклучувајќи ги и правосудните органи.
На Централниот комитет пак, денеска ќе биде презентирана анализата на партијата за изгубените локални избори на која што изминатиов период работел поширок тим.
„Анализата опфаќа куса, сублимирана верзија за причините за изборните резултати, но и детална обработка на информациите и согледувањата по Општински Комитети“, тврди партијата.