Државниот инспекторат за животна средина очекува до крајот на неделава или од почетокот на следната недела, инспекторите на терен да имаат можност да снимаат и со дрон, информира за НОВА, актуелниот директор на Инспекторатот, Мирослав Богдановски.
Дроновите ќе снимаат кога инспекторите ќе проценат дека има потреба за тоа, но интервенции ќе можат да се вршат само кај фабриките, не и кај домаќинствата.
„Склучивме договор за изнајмување дронови со професионален управувач и со сите потребни дозволи. Или до крајот на неделава или од почетокот на следната недела два дрона ќе ни бидат на располагање. Тие ќе бидат во функција на инспекторите, односно за полесно лоцирање на жаришта каде што има проблем. На пример, имаме претставки во Лисиче, за големени концентрации на ПМ честиците, односно надминување на дозволениот праг. Имаме пријави во Карпош, Момин Поток, Визбегово…Тие критични точки полесно ќе ги лоцираме со дронот од кои ќе имаме снимки кои ќе ги објавуваме јавно, со податоци каде е снимано и зошто“, објаснува Богдановски.
Како што вели тој, инспекторот е оној кој ќе ги дава насоките каде се снима.
Инспекторатот на располагање има шест батерии, а капацитетот за снимање е еден до два часа во денот.
„Следно што ќе направиме е ќе набавиме термална камера која ќе може да ни помогне и ноќно време да лоцираме топлински извор“, дополнува тој.
Сепак она што го кочи Државниот инспекторат е да дејствува кај домаќинствата, бидејќи таму немаат ингеренции за да интервенираат, и покрај тоа што според студиите, домаќинствата се најголемиот учесник во загадувањето.
„Немаме ингеренции за домаќинствата, тоа нели се прави со посебен судски налог на некој дома да му се влезе. Државата нема донесено Правилник за цврсти горива каде што би било опишано на што смеат домаќинствата да се греат. Во домаќинствата, тоа е посебен проблем кој во иднина ќе мора да се решава особено откако студиите покажуваат дека домаќинствата имаат најголемо учество во загадувањето. Тој проблем ќе мора да се решава, гасификацијата знаеме дека е долгорочна мерка, но дотогаш ќе треба да се донесе Правилник за тоа кој што смее да гори“, потенцира директорот на Инспекторатот.
Изминативе два месеци, многу често скопјани се будат во град кој според статистиките, е најзагадениот во Европа.
Владата во декември излезе со забрзани краткорочни мерки, кои би требало да помогнат во периодот кога е најзагадено, но бидејќи се работи за комплексен проблем, каде што учество покрај домаќинствата имаат и возилата и индустријата, проблемот со загадувањето тешко дека ќе биде надминат и во следните неколку години.
Како што апелираат надлежните, мора што поскоро да се направи целосна гасификација на градот, потоа постепена замена на старите возила и што поскоро опремување на сите фабрички капацитети со стандардизирани дозволи, за ПМ10 и ПМ2.5 честиците да станат минато.