Нема план Б, прашањето со името е во моментов најголемата пречка за членство на Македонија во НАТО, порача денеска генералниот секретар на НАТО, Јенс Столтенберг по средбата со премиерот Зоран Заев во Владата.
Оваа изјава, Столтенберг ја даде на новинарско прашање дали е можно Македонија да стане членка на НАТО а притоа да го решава проблемот со името.
„Спорот за името со Грција мора да се реши. Нема друг начин за влез на земјата во НАТО. Ова беше нагласено на Самитот на НАТО во Букурешт во 2008 година, а потоа повторено на Самитот во Велс во 2014 и во Варшава во 2016 година, истакна Столтенберг, дополнувајќи дека во НАТО сите земји членки имаат иста тежина на гласот.
Повторувајќи ги истите пораки кои ги кажа од собраниска говорница денеска, во однос на реформите, Столтенберг сепак нагласи дека со Македонија треба да се биде искрен.
„Имате голем пргрес во реформите, но мора да бидеме искрени. НАТО одлуките ги носи со консензус. Затоа навистина се надевам дека ќе го решите спорот со името и го поздравувам новиот моментум во преговорите. НАТИ не може да го реши името и да дава предлози, тоа треба вие да го решите“, потенцираше тој.
Премиерот Заев пак, рече дека оваа посета на генералниот секретар на НАТО е клучна за вистинско охрабрување и поддршка на владините очекувања дека 2018 годна ќе биде историска година како за државата така и за регонот, за НАТО и ЕУ.
„ Не можам да не изразам задоволство од обновениот интерес на НАТО за Западен Балкан во еден значаен и чувствителен геостратешки момент. Време е да ги внесеме во завршница процесите на интеграција на сите земји од регионот што сакаат да бидат дел од семејството на Северноатланската алијанса. Ние сме подготвени да работиме заедно во остварување на таа цел“, истакна премиерот.
Заев воедно потенцираше дека Владата останува посветена на домашните реформи што ја зајакнуваат и унапредуваат положбата на Македонија во согласност со политичките критеируми за членство во НАТО.
„Создаваме добар моментум за последниот заеднички исчекор и очекуваме Република Македонија да стане 30-та земја членка на НАТО. Работиме за таа цел заедно со граѓаните и со сите наши партнери земји членки на НАТО“ рече Премиерот.