https://www.youtube.com/watch?v=RT7tbePf6Uc&t=
Вицепремиерот задолжен за европски прашања во Владата, Бујар Османи, во разговор со Борјан Јовановски вели преговарачкиот процес за прашањето со името влегува во завршна и можеби најтешка фаза, дека во следниот период ќе има обиди за минирање на процесот, но верува дека со волја од двете страни, прашањето со името може да се реши.
„Добрата волја од двете страни, подигнатото ниво на средби и преговори помеѓу министерствата за надворешни работи и премиерите создаваат добар амбиент за решавање на спорот со името“, вели Османи.
Тој потенцира дека сепак било каква одлука да има, тоа ќе биде најтешката одлука која некој политичар ја донел во историјата на државата.
Тој открива дека четири од седум точки се предмет на преговори меѓу двете држави, а позитивно е тоа што според сензитивноста, и двете страни ќе можат да попуштат во преговорите по малку.
Османи верува дека ако и Македонија и Грција внимаваат за интересите на едната за другата, дека може да се дојде решение.
На прашањето дали треба меѓународна поддршка во процесот, Османи вели:
„Дипломатски булдужеринг треба, не само за ова прашање туку и за други работи. Нема да биде лесно и помош од било кого во овој дел е добредојдена. Меѓутоа треба да сме свесни дека ќе има и тука и во Грција и од надвор некој кој ќе сака да одмогне. Не смееме да потпаднеме на таквите провокации. Ќе има обиди за минирање на процесот, ова се очекувањата, а тука треба политичарите кои одлучуваат од двете страни да останат смирени и да ја гледаат долгорочната перспектива на државата“.
За ВМРО-ДПМНЕ вели дека во моментов се конструктивни за разлика од опозицијата во Грција.