Поранешниот припадник на злогласните нацистички СС-единици Оскар Гренинг, познат како „Книговодителот од Аушвиц”, почина на 96 години , објави „Шпигел онлајн”.
Гренинг во јули 2015 година од Окружниот суд во Линебург беше осуден на четири години затвор за помагање и поттикнување на убиства во 300.000 случаи во концентрациониот логор Аушвиц. Тој поднесе молба за помилување до министерката за правда на гермаската покраина Долна Саксонија, Барбара Хавлиза. Одлуката требаше да биде донесена до крајот на оваа недела.
Во пресудата која е правосилна од 2016 година се вели дека не можело да се докаже неговата вмешаност во конкретно убиство. Сепак, преку надзорот на багажот и управување со средствата на затворениците, ги поттикнувал убиствата.
Во средината на јануари, канцеларијата на јавниот обвинител на Линебург го отфрли барањето за помилување на Гренинг. Со него тој сакаше да спречи извршување на казната. Претходно и Сојузниот уставен суд на Германија отфрли можност за одложување на затворската казна.
Во судскиот процес, Гренинг целосно ја признал вината и повеќепати изрази каење. Тој велеше дека „ директно” немал ништо со убиствата, но оти со неговата активност „придонел за функционирање на логорот Аушвиц”.
Иако ја призна вината, но до последен момент се противеше да пристапи кон издржување на затворската казна.