Државниот обвинител на САД Џеф Сешнс му врачи отказ на поранешниот заменик директорот на ФБИ, Ендрју Мекејб, само два дена пред тој да замине во пензија.
Мекејб е отпуштен бидејќи врз основа на интерна истрага што ја спровело американското министерство за правда било откриено дека тој неовластено им откривал информации на медиумите и не се однесувал чесно во истрагите кои ги водело обвинителството и министерството за правда.
„ФБИ од своите вработени очекува да се придржуваат кон највисоките норми на чесност и одговорност“, истакна министерот за правосудство и државен обвинител на САД, Џеф Сешнс.
Мекејб веќе подолг период беше мета на критика на претседателот Трамп бидејќи тој отворено се спротиставуваше на неговите политики. На веста за отказот, Мекејб рече дека е жртва на „војната“ која Трамп ја води со ФБИ и со специјалниот државен обвинител Роберт Милер кој го истражува мешањето на Русија во претседателските избори во САД.
„ Ова е вистината: Јас сум жигосан, изолиран сум и со мене се постапува вака поради улогата која ја имав, одлуките кои ги носев и поради настаните на кои бев сведок по отстранувањето на Џејмс Коми“ изјави Мекејб.
Отказот веројатно ќе покрене многу прашања дали Мекејб е казнет премногу сурово поради политички притисок од страна на Трамп.
Претседателот Трамп на Твитер го изрази своето задоволство од отказот што му бил даден на Мекејб.
„Мекејб е ОТПУШТЕН. Тоа е голем ден за мажите и жените кои работат напорно во ФБИ-ова е голем ден за демократијата“ напиша Трамп.
Andrew McCabe FIRED, a great day for the hard working men and women of the FBI – A great day for Democracy. Sanctimonious James Comey was his boss and made McCabe look like a choirboy. He knew all about the lies and corruption going on at the highest levels of the FBI!
— Donald J. Trump (@realDonaldTrump) March 17, 2018