Ако до 14 април не се најде трајно решение за извозот на брашното во Македонија, Србија ќе воведе контра мерки, соопшти денеска министерот за трговија, туризам и телекомуникации Расим Љајиќ.
Во утринската програма на ТВ Н1, Љајиќ денеска рече дека Србија ќе биде трпелива зашто трговската и царинската војна не се во интерес на двете земји.
– До 14 април мораме да најдеме трајно решение за извозот на брашното во Македонија. Воведувањето контра мерки, за жал, се уште е опција. Ние имаме трпение, не сакаме да влеземе во трговска и царинска војна, да воведуваме контрамерки, бидејќи тоа не е во интерес на стопанството и на меѓусебните односи. Јас им кажав да не не тераат тоа да го направиме, но тоа навистина ќе го сториме овој пат ако не најдеме трајно решение, истакна српскиот министер и најави нов состанок во Скопје за две недели.
Според него, проблемот со брашното го прават три млина од Македонија кои, како што рече, имаат економско и финасиско влијание со што успеваат да наметнат вонцарински бариери.
Се бара модел, дополни Љајиќ, за трајно решение за да не се повторува проблемот секоја година.
– До 14 април е крајниот рок кога мораме да најдеме трајно решение за овој проблем. Во понеделник имам состанок со нашите мелничари, бидејќи сето ова го правиме заради нив, а не поради политички намери, да видиме дали постигнатото решение се спроведува. Ќе бидеме трпеливи до 14 април и повеќе нема да бидеме трпеливи, порача спркиот министер.
Според него, постојат неколку модели за решавање на проблемот, меѓу кои, потполно укинување на маркичките и трајно признавање на сертификатите.
На разговорот со македонскиот министер за замјоделство Љупчо Николовски не беше постигнато конечно решение и затоа, нагласи Љајиќ, се формира Мешовитиот комитет.
– Пред два дена во Белград се одржа состанок на Меѓувладиниот комитет со релеватни институции од Србија и од Македонија. Говоревме генерално за олеснување на трговијата, а не само за брашното и за останатите прашања. Направивме исчекор и за две недели би требало да го продолжиме тој дијалог во Скопје, изјави денеска српскиот министер.
Mинистерот за земјоделство, шумарство и водостопанство Љупчо Николовски, во врска со изјавата на Љаиќ рече дека преку Мешовитиот комитет се работи на изнаоѓање трајно и систематско решение за увозот на српското брашно, додавајќи дека проблемот се провлекува повеќе години и за негово надминување се разговара долго време.
– И еден од заклучоците на Мешовитиот комитет е да се бара трајно и систематско решение. Целта е конечно надминување на проблемот, за да не се повторува секоја година, изјави Николовски.
Според него, Комитетот кој првпат заседаваше завчера во Белград, во рок од 30 дена треба да излезе со предлози за трајни и систематски решенија, не само за брашното, туку и за сите останати нецарински бариери кои би ја унапредиле трговската размена.
– Можна е нова седница на Мешовитиот комитет до крајот на март, ако не и порано, истакна Николовски.