Иднината на Македонија и Грција треба да биде во фокусот на преговорите на двете земји за решавање на спорот со името, е заклучокот од денешната средба на премиерот Зоран Заев со грчкиот министер за надворешни работи Никос Коѕијас.
– Треба да сме одлучни и да правиме чекори кои не водат поблиску до решението на единственото отворено прашање меѓу нашите две земји. Уверен сум дека овој пристап ќе доведе до решение кое ќе им даде доволно прифатливи аргументи на институциите во двете земји, како и на опозицијата, да прифатат дека тоа ќе биде достоинствено и за Република Македонија и за Република Грција, нагласил Заев на средбата, соопштија од прес службата на Владата.
Заев, кој на средбата беше придружуван од министерот за надворешни работи Никола Димитров истакнал дека и оваа средба го зазема своето место како значајна во разговорите за проблемот што Република Грција го има со уставното име на Македонија.
Исто така се истакнува дека средбата се совпаѓа со еден исклучително позитивен момент кога се очекуваат трајни решенија за билатералните прашања во регионот во перспектива на очекувањата на ЕУ.
Заев нагласил дека и двете земји за време на процесот практикуваат и негуваат една заедничка, европска вредност, а тоа е взаемното градење на подобри билатерални односи и релации на доверба.
Коѕијас потенцирал дека сегашноста и иднината бараат одговорност за решение на отвореното прашање.
Според него, Грција, како земја членка во НАТО и ЕУ со најстара демократска традиција во регионот, има голема одговорност за решавање на ова прашање и дека мора да се најде компромис прифатлив за двете страни.