Лилијана Танги, првата француска пратеничка со македонско потекло во интервју за МИА вели дека Франција одблиску го следи сето она што се случува во Македонија и ја охрабрува земјава да продолжи со спроведувањето на реформите, но и да го подобри функционирањето во Собранието.
Таа додава оти посакува Македонија и Грција да изнајдат заедничко прифатливо решение за спорот со името и истакнува дека е оптимист оти Македонија ќе може да ги почне преговорите за членство во Европската Унија, по забележаниот напредок со доаѓањето на новата Влада.
Во врска со парламентарната соработка Танги смета дека парламентарната дипломатија е многу важна за запознавање на двете земји и за воспоставување соработка, а во работата на Парламентот ја издвојува важноста од препознавање и издигнување на националниот и на државниот интерес над партиските.
– Работите никаде не се совршени, во ниту едно Собрание. Во македонското Собрание можеби нема толку честа размена на мислења или дебати, односно би рекла нема конструктивни дебати. Веројатно постои опструкцијата од страна на опозицијата. Од една страна тоа можеби е нормално, но не треба да биде претерано. Во одреден момент ќе треба, пред се да го имаме предвид генералниот интерес, интересот на земјата кој треба да надвладее над партиските интереси – вели Танги.
Таа додава дека во Франција успеале да создадат една политичка сила, која се нарекува Републиката во движење, основана од претседателот на земјата, Емануел Макрон.
– Станува збор за своевидно движење кое успева да ги истакне добрите нешта со кои настојуваме да чекориме кон прогрес и да ги земеме добрите идеи и иницијативи од сите страни без оглед од која политичка партија доаѓаат. Тоа е своевиден нов начин на водење политика, надвор од делувањето на традиционалните партии, каде се обидуваме да бидеме помалку догматични, а повеќе прагматични и секогаш чекорејќи кон вредности, кон напредок и токму постигнувањето на таков прогрес треба да биде нашата вредност – вели Лилијана Танги во интервјуто за МИА што во целост ќе биде објавено утре.
Пратеничката во Националното собрание на Француската Република од редовите на партијата на францускиот претседател Емануел Макрон, престојува во тридневна посета на Македонија.
Танги, која е потпретседателка на Комисијата за европски прашањам задолжена за Балканот и заменик-претседател на групата за парламентарна соработка меѓу Франција и Македонија се сретна со премиерот Зоран Заев, претседателот на Собранието, Талат Џафери и со претседателот на државата, Ѓорге Иванов.