Директорот на Мерцедес, Тото Волф најави интерна истрага за „кој беше најслаба клупска алка“ во трката за ГН на Австралија, прва трка од новата сезона во Формула 1 шампионатот, и за причините зошто Луис Хамилтон ја загуби водечката позиција на „Мелбурн парк“.
„Сè уште не знаеме што се случи. Мислевме дека имаме доволна предност, мислевме дека имаме водство од три секунди, но изгледа беше грешка во нашиот софтвер. Ќе мора „да ги прашаме“ компјутерите. Отпочнавме темелна истрага со намера да го лоцираме проблемот. Конечниот епилог е тешко прифатлив бидејќи имавме добро темпо и брзина. Истрагата ќе покаже зошто ја загубивме победата“, истакна Волф во изјава за „Скај“.
Хамилтон имаше најдобро време во квалификациите, тргна од пол-позицијата во централниот настан на отворање на сезоната и ја предводеше колоната до моментот во кој на патеката се појави виртуелно безбедносно возило. Тоа дојде како „кец на десетка“ за Германецот Себастијан Фетел кој набрзо го посети боксот, ги замени пневматиците и се врати пред Британецот на патеката.
„Нашиот систем во тие моменти направи лоша пресметка за предноста што ни е потребна. Зеленото светло беше постојано на компјутерот што значи дека водство што го имаме е доволно да останеме лидери во трката. Но, кога ја погледнавме телевизиската снимка заклучивме дека водството не било доволно“, појасни Волф.
На британскиот возач во тимот на Мерцедес не му беше сеедно што го загуби статусот на лидер во трката. Тоа стана при обраќањето кон механичарите во боксот.
„Момци, што се случи? – Зошто никој не ми кажа дека Фетел е во бокс? – Дали е моја грешката?“, беа прашањата на Хамилтон кон луѓето во боксот на Мерцедес.
И покрај загубеното водство, тој не се откажа од намерата да се врати каде што беше, се обиде да го претекне Фетел во што, сепак, не успеа, па Германецот на крајот уживаше во 48. триумф во кариерата во 200. трка. Но, и јубилеен 100. пласман на победнички пиедестал колку што имаат уште Луис Хамилтон, Михаел Шумахер и Алан Прост.
„Луис не можеше ништо да стори. Секако дека напаѓаше, но тешки се претекнувања на патеката во Мелбурн. Дури и оние кои најдобро го прават тоа, се соочуваат со проблеми да заобиколат ривалски болид во Австралија. Мораше да се откаже бидејќи неговите пневматици немаше да издржат докрај“, заклучи Волф со што застана во одбрана на Хамилтон.
Сезоната во Формула 1 продолжува на 8 април со трка за ГН на Бахреин.