Генералниот секретар на ОН, Антонио Гутереш, побара независна истрага по крвавите настани во Газа во кои загинаа шеснаесет Палестинци во судирите со израелските војници, а стотици беа повредени.
Судирите се случија во вчера – тоа беше најсмртоносниот ден во израелско-палестинскиот конфликт од војната во појасот Газа во 2014 година.
Советот за безбедност на ОН го осуди насилството на итна седница.
Шефот на заменик-министерот за политички прашања на ОН, Тај-Брук Зерихоун, изјави дека ситуацијата во Газа „може да се влоши во наредните денови“ и повика во судирите да бидат заштитени цивилите,особено децата.
„Израел мора да ги почитува своите обврски според меѓународните човекови права и хуманитарното право“, рече тој.
Во писмена изјава пред состанокот на Советот за безбедност, израелскиот амбасадор во ОН, Дени Данон, ја обвини милитантната група Хамас за крвопролевањето.
Палестинскиот претседател Махмуд Абас изјави дека израелските власти имаат „целосна одговорност“ за крвавите судири.
Илјадници Палестинци вчера го почнаа шестнеделниот протест под шатори долж границата со Израел со барање да им се дозволи на палестинските бегалци да се вратат во Израел. Тие поставија десетици шатори на пет локации долж границата.
Организатор на протестите е Хамас. Првиот ден од протестите се совпадна со „Денот на земјата“ кога Палестинците им оддаваат почит на шестмина невооружени Палестинци, кои беа убиени во судир со израелските сили за време на демонстрации против конфискувањето земјиште на 30 март 1976 година.
Според израелската армија Палестинците ги нападнале припадниците на израелската армија, распоредени долж границата, со запалени гуми и камења, а израелските војници возвратија со солзавец и огнено оружје.
Лидерот на военото крило на Хамас во Појасот Газа, Јахија Синвар изјави дека Израел треба да го почитува барањето на десетици илјади Палестинци, кои демонстрираат за правото на враќање во своите домови во Израел, кои ги напуштија по создавањето на еврејската држава во 1948 година.
– Маршот за враќање ќе продолжи. Нема да престанеме додека не се отстрани границата (помеѓу Газа и Израел), најави Синвар.