Мнозинството Македонци и Грци сметаат дека е важно веднаш да се најде решение за спорот за името и дека одложувањето на разрешувањето ќе биде на штета на државата, покажуваат анкетите на јавното мислење кои во Македонија ги спроведе Центарот за европски студии во партнерство со Фондацијата Фридрих Еберет, а во Грција фондацијата за надворешна политика „Елиамеп“.
На прашањето: „Колку е важно веднаш да се изнајде решение за спорот за името?“, 44 проценти од Македонците одговориле дека е „многу важно“, а 31 процент дека е „важно“.
Во Грција, 53 проценти одговориле дека е „многу важно“ веднаш да се изнајде решение за спорот, а 19 проценти дека е „важно“.
На прашањето дали верувате дека одложувањето на разрешувањето на спорот е на штета на државата?, 61 процент од Македонците одговориле потврдно, а кај Грците 56 проценти.
Речиси идентичен е процентот на Македонци и Грци кои на прашањето, какви се односите меѓу двете земји, одговориле „ниту добри, ниту лоши“- 50 проценти во Македонија и 57 проценти во Грција. Сепак, значително е поголем процентот на Грци кои односите ги оцениле како „добри“ – 30 %, а кај Македонците само 14% рекле дека односите се „добри“.
За истражувачите е важен и податокот дека 30 проценти од Македонците рекле дека во изминатите три години биле во Грција, што значи околу 600 000 луѓе од вкупната популација во земјава патувале за Грција.
Компаративна анализа на двете анкети покажува дека Македонците и Грците најмногу се разликуваат според перцепцијата на земјите во кои гледаат закана.
Секој втор Грк рекол дека најголема закана е Турција, а Македонија за непријателска земја ја посочиле само 2,5 проценти. За Македонците пак најголема закана е Грција (27,76% кај Македонците и 10,73% кај Албанци), а најголем пријател е Турција (18,2% Македонци и 13,3% Албанци). Турција е најпријателска земја и за гласачите на СДСМ и за гласачите на ВМРО ДПМНЕ. По Турција, за најпријателска земја е посочена Србија, потоа Русија, Германија , Бугарија, САД.
Споредено со анкетата направена во ноември, расте подршката за влез на Македонија во ЕУ и е најголема досега 70 отсто.
На прашањето: Доколку во недела се одржи рефрендум со прашање „Дали сте за влез на Република Македонија во ЕУ?“, како би гласале?, 70 проценти одговориле дека ќе гласаат потврдно. Во номври, овој процент бил 68%. Зголемен е и бројот на граѓани кои позитивно го оцениле Договорот за добрососедство со Бугарија. Сега, 48,99 проценти рекле дека Договорот е позитивен, а во ноември овој процент бил 42,80.