Пратениците од власта и опозицијата денеска ги усвоија измените на Законот за заштита на сведоци, што ги бараше Специјалното јавно обвинителство, а за кој требаше двотретинско мнозинство. Измените беа донесени со 86 гласови „за“.
Пратеничката од ВМРО-ДПМНЕ, Невенка Стаменковска рече дека ги подржале измените откако биле усвоени и нивните забелешки.
„Согласно предлозите кои ги давовме, вкупно 11 на број од страна на ВМРО-ДПМНЕ, се направи интервенција во постоечкиот закон и можеме да кажеме дека правдата е задоволена. Ваквиот закон можеби не е идеален, но е подобар од оној што беше предложен на почетокот од страна на СДСМ“ – рече Стаменковска.
Од СЈО за НОВА кажаа дека очекуваат со овие измени да бидат надминати дел од пречките во нивната работа.
Со измените се дава можност и на Специјалното јавно обвинителство да предлага лица кои ќе бидат вклучени во програмата за заштита на сведоци, за случаите што се во надлежност на СЈО, што досега беше во надлежност само на Јавното обвинителство. Во оваа Програма освен сведоци и соработници на правдата, ќе можат да бидат вклучени и жртви кои се јавуваат во својство на сведок или лица за кои ќе се процени дека можат да бидат изложени на заплашување, закана или опасност по животот, здравјето, слободата, физичкиот интегритет или имотот. Барањето СЈО ќе треба да го достави до Советот за заштита на сведоци кое треба да одлучи во рок од 8 дена.
Исто така, доколку СЈО оцени дека жртвата е загрозена и не може да биде заштитена од полицијата, ќе го извести Одделението за потреба од примена на итни мерки. СЈО може да предложи и продолжување на мерките за заштита на сведоци утврдени во Програмата.
Инаку, специјалната јавна обвинителка, Катица Јанева уште од јануари 2016 година, бараше измени во Законот за заштита на сведоци, но поради несогласување на пратениците од ВМРО ДПМНЕ овие измени досега не беа усвоени.