Премиерот Зоран Заев по завршувањето на денешното рочиште за случајот „Поткуп“ изјави дека во разговорите од Посебните истражни мерки (ПИМ) што се преслушуваа на рочиштето, без присуство на јавноста, немало „апсолутно никакви докази“ против него.
Тој рече дека со разгледување на разговорите од ПИ-мерките ќе се продолжи в понеделник и оти тоа ќе трае се додека не се преслушаат сите, по што ќе се продолжи со останатата доказна постапка.
„Тоа се редовни комуникации на тогашен градоначалник со осомниченото лице и сите други лица, како што се директори на институции, граѓани кои се јавуваат кај тогашниот градоначалник Заев. Продолжуваме во тој дел. Апсолутно ниту обвинителството алудираше на разговорите, алудираше на сведокот. Јас очекувам да привршува овој предмет и секако судската пресуда конечно ќе ја почитуваме каква и да биде, рече Заев.
На новинарско прашања дали дознал колку време бил следен, Заев рече дека бил следен нешто повеќе од две години. Тој додаде дека, согласно закон ако се работи дури за тероризам или загрозување на уставниот дел на државата, стабилноста и суверенитетот следењето може да биде најмногу до една година и три месеци. Но, како што дополни, тоа го остава на правосудните истанци да одлучуваат во делот на следењето.
„Јас немам ништо што ме плаши во делот на разговорите и апсолутно немам никаква дилема. Нека се слушаат сите разговори, важно ми е правно формалната постапка да биде следена пред се од моите адвокати за да може секако да ги добијам сите загарантирани права согласно Устав и закон. Органите како што е Јавното обвинителство и Судот да си ги носат одлуките исто така согласно закон“ посочи Заев.
Премиерот Заев рече дека ги нема изброено сите разговори, но додаде оти знае дека се работи за преку 10 илјади разговори, дел се со ПИ-мерки, а дел се без ПИ мерки.