Од утре и официјално започнува новата учебна година. Наставата годинава ќе ја следат околу 200 000 ученици. Во средношколските клупи се запишаа 20 049 ученици и 20 700 првачиња. Продолжува трендот на опаѓање на бројот на првооделенци во училиштата низ Македонија. Во Министертвото за образование минатата недела изразија загриженост поради оваа појава.
– Со жалење морам да констатирам дека во изминатите пет-шест години има во просек од 500 до 700 помалку запишани првачиња. И оваа година бројот е намален во однос на минатата. До денес се запишани 20.774 првооделенци, бидејќи уписот трае уште, очекувам бројот да порасне. Но, дефинитивно, ќе има повторно помалку запишани во прво одделение, рече министерот за образование Спиро Ристовски, одговарајќи на новинарски прашања по посетата на ОУ „Блаже Конески“..
Родителите пак ги загрижува цената на учебниците и неможноста на учениците да користат поголем број од книгите поради нивната лоша состојба. Учебниците кои децата ги користат веќе четири години се наоѓаат во лоша состојба.
Петтата по ред генерација коа ќе треба да ги користи овие книги веќе се прашуваат како ќе учат од одлепени учебници, без корици, со страници кои недостасуваат. Родителите се загрижени, не знаат што да прават.
-Не знам како ќе справиме со ситуација оваа година, учебниците се во многу лоша состојба изјави загрижен родител за НОВА.
Премиерот Груевски ги смирува родителите и наставниците.
-Eдинстево што загрижува е намалениот број на запишани прво одделенци. Родителите и годинава не мора да се грижат за учебници и превоз бидејќи и оваа ќе важи мерката за бесплатен превоз и бесплатни учебници за учениците. Тие што се стари ќе бидат заменети со нови, најави премиерот Груевски.
Според правилата учениците се должни да ги чуваат учебниците , а родителите треба да платат доколку се случи некој учебник да биде оштетен. Но, родителите велат дека ваквата обврска во случајот е многу нелогична со оглед на тоа што неможе да се работи со голем дел од учебниците бидејќи се распаѓаат. Со ова ситуација се запознати и директорите на училиштата информира телевизија Телма.
-Обично го информираме Министерството за бројот на оштетени учебници, но многу често родителите не не` известуваат и веднаш ги копираат овие книги, вели Драган Арсовски директор на гимназијата „Раде Јовчевски Корчагин“.
На веб страна на Министертвото за образование стои ценовник за секој оштетен учебник посебно. Родителите на децата кои ги оштетиле книгите треба да платат 70 проценти од продажната цена на учебниците.
Но, зачудува фактот што сумата која треба да се плати за одредени учебници е за 20 до 35 проценти, а за некои и многу повисока од минатата година. Ваков тренд на зголемување на цените на оштетените учебници е забележлив и минатата година, но со многу помал процент на зголемување.
НОВА се обиде да истражи и увиде дека слична е ситуацијата со цените на оштетните учебници во основното, средното-стручно и гимназиското образование.
Така еден учебник по Француски јазик за средно гимназиско образовани за кој во 2011 –та требало да се плати 310,80 денари, во 2012 чинел 450,17 денари, годинава за неговото оштетување родителите треба да платат 551,25 денари. Ова е за 23 проценти повеќе од лани или речиси 80 проценти повеќе од пред две години. Иста е ситуацијата и со цените на другите учебници.
Нејасно, е дали цените на оштетените учебници се зголемуваат со растот на цените на новите учебници на пазарот.
Доколку е така, надлежните имаат обврска да го земат во предвид фактот дека годинава станува збор за учебници кои ќе се користат петта година по ред, кои се максимално користени во претходните четири години, а чие оштетување е нормално кога станува збор за хартија коментираат за НОВА родители кои сакаат да останат анонимни.