Црногорските новинари денеска ќе протестираат пред Владата во Подгорица по синоќешниот напад врз новинарка на „Вјести“ во која беше пукано пред влезот на зградата во која живее.
Директорот на „Вјести“ Жељко Ивановиќ вели дека нападот ја „дефинира Црна Гора како мафијашка држава, а Ѓукановиќ како покровител на мафијата“. Тој исто така рече дека Ѓукановиќ воспоставил таков систем на вредности и општество во кое не му се гарантира безбедноста на ниту еден чесен човек. Колегите на ранетата новинарка посочуваат дека секогаш кога Ѓукановиќ ќе повика на линч, ширење на говор на омраза и ќе го таргетира „Вјести“ се случуваат напади кон нивните новинари.
И косопственикот на весникот Мишко Перовиќ вели дека не може, а да не се забележи дека „секој пат кога „гоподарот на Црна Гора“ ќе го критикува „Вјести“, следува пресметка со нас„.
Кон новинарката на црногорски „Вјести“ Оливера Лакиќ беше пукано синоќа околу 21 часот пред зградата во која живее. Таа е застрелана во потколеницата и е надвор од животна опасност. Во неа пукал маж кој избегал заедно со уште две лица. Се претпоставува дека тие ја чекале новинарката да се врати дома, скриени зад грмушки. Лакиќ, на истото место била претепана пред 6 години. За овој случај, полицијата осудила едно лице, но без да ги открие мотивите за нападот и нарачателот.
„До кога веќе до кога ова ќе се случува во Црна Гора“ се прашува главниот и одговорен уредник на „Вјести“ Михајло Јововиќ кој додава дека досега не е истражен ниту еден случај на проневера и криминал за кои пишувала новинарката.
Новинарката Лакиќ во изминатите месеци пишувала за шверц на цигари. Таа уште во 2011 година пишувала дека во фабриката „Тара“ се произведувале и се шверцувале лажни брендови на цигари и дека во овие незаконски дејствија се вклучени и полициски службеници и припадници на Агенцијата за Национална безбедност.
Премиерот на Црна Гора Душко Марковиќ побара брза и ефикасна истрага од надлежните за откривање на мотивите на нападот, напаѓачите, соучениците и наредбодавачите.