Европската комисија (ЕК) денес им предложи на земјите членки да забранат десетина производи што секојдневно се употребуваат а коишто содржат пластика.
Помеѓу нив се стапчињата за уши, пластични чаши и чинии, сламки и стапчињата со кои се мешаат пијалоци или пластичните стапчиња на кои се закачуваат балони. Овие производи наскоро ќе треба да се произведат од потрајни материјали. Цел на мерката е да се спречи понатамошно загадување на човековата околина, морињата и океаните од пластика.
Според научните студии токму овие десет производи, за еднократна употреба, сочинуваат најголем дел од морскиот смет, до 70 отсто од вкупниот смет во морињата и океаните, изјави денес потпретседателот на ЕК Франс Тимерманс.
“ЕУ не е најголемиот загадувач со овие производи од пластика, но ЕУ сака да биде првата што ќе најде решение”, изјави тој.
ЕК смета исто така дека загриженоста за човековата околина може да донесе економски интерес. ЕУ би сакала да биде прва во производството на овие продукти но без пластика:
“Европа би можела прва во креирањето на производи коишто ќему бидат потребни на целиот свет во децениите пред нас и со тоа да извлече економска вредност од ресурсите кои се ограничени”, вели комесарот за компетитивност Јурки Катаинен.
Според предлогот на ЕК, земјите членки ќе мораат да постигнат 90 отсто собирање и рециклажа на пластичните шишиња до 2025 година. Еден од начините би бил наплата на кауција за секое продадено пластично шише.
Некои производи ќе треба да добијат етикети на кои јасно ќе пишува како производот треба да се елиминира, какви се неговите ефекти врз човековата околина и колку пластика има во него. Ова се однесува пред се влажните марамчиња, влошките и балоните.
Со овие мерки ЕК сака да бидат намалени емисиите на ЦО2 за 3,4 милиони тони. Брисел верува дека овие мерки ќе бидат усвоени пред европските избори во мај 2019 година.