Нуркачите кои утрово влегоа во поплавената пештера во северен Тајланд Там Луанг планираат денеска да ги спасат преостанатите четири момчиња и нивниот тренер, во третата и последна спасувачка мисија, соопшти раководителот на спасувачката операција.
Деветнаесет нуркачи влегле во пештерата во 10 часот изутрина по локално време и ќе се движат низ тунелите за да изнесат на површината петмината членови на фудбалскиот тим „Диви вепри“ и уште четворица стручни лица кои се во пештерата веќе 10 дена и им помагаат на децата.
-Се надевам дека сите четири деца, тренерот, лекарот и тројцата припадници на единицата „фоки“ ќе бидат извлечени денеска, изјави поранешниот гувернер на провинцијата Чанг Раи, сега раководител на операцијата, Нармонк Осотанакорн.
Осум од 12 момчиња кои беа заробени во поплавената пештера од 23 јуни, беа извлечени во текот на првите два дена од спасувачките операции. Тие сега се опоравуваат во болница и се вели дека се “во добра здравствена состојба”.
Момчињата на 23 јуни тргнале на ексурзија со тренер, но биле заробени во внатрешноста на пештерата поради поројните дождови.
Откако беа пронајдени на 2 јули, властите предупредија дека акцијата на нивно извлекување може да потрае, поради поројните дождови. Но поради загрижувачките прогонози поради сезоната на дождови, сепак властите одлучуја акцијата да биде спроведена веднаш.
Спасените момчиња се опоравуваат во болница
Осумте момчиња кои се надвор од пештерата се згрижени во болницата во Чианг Раи. Медицинските лица за новинарите изјавиле дека тие се здрави, и физички и психички и комуницираат.
За едно од момчињата се вели дека било донесено со воспаление на белите дробови, а друго дека имало забавен пулс, но состојбата и на дветесе подобрува, соопштуваат од тајландското Министерство за здравство.
Семејствата на првите четири момчиња веќе можеле да ги видат своите деца, но засега преку стакло.
Децата се во карантин се додека не се утврди дека тие немаат никакви инфекции, за што се чекаат резултати од лабораторијата во Бангкок. Се претпоставува дека тие најверојатно ќе останат во болница најмалку една недела, поради нивниот ослабен имунитет.
Иван Караџиќ еден од нуркачите во меѓународниот тим за Си Ен Ен изјавил дека е изненаден колку децата се силни. Тој открива дека ниту едно од децата досега не нуркало, а поголемиот дел ниту знаат да пливаат.