Од ноќеска во 01.00 часот по локално време, официјално е укината вонредната состојба во Турција која беше воведена на 21 јули 2016, веднаш по обидот за воен удар и досега беше просолжувана седум пати на период од три месеци.
Според Уставот, доколку до Собранието не се достави ново барање за продолжување на вонредната состојба се до завршувањето на вонредната состојба, тогаш вонредната состојба автоматски се укинува.
Ердоган ја искористи вонредната состојба за да владее со декрети и издаде над 30 укази.
По неуспешниот државен удар уапсени се над 77.000 лица поради наводни врски Ѓулен, а над 110.000 државни службеници, вклучително и учители, полицајци, научници, гувернери и адвокати, заедно со 4.000 судии и обвинители добија отказ. Исто така, отказ добија и повеќе од 5.705 научници од 119 универзитети,
За време на вонредбата состојба повеќе од 1.500 луѓе, вклучително војници и новинари беа осудени на доживотен затвор.
Според Репортери без граници, 162 новинари се наоѓаат во затвор, а десетици медиуми беа затворени. Според Комитетот за заштита на новинарите, во затвор се наоѓаат 73 новинари.
Во изминатите две години 985 стопански субјекти, вклучително и болници, универзитети и невладини организации, биле или затворени или казнети, а 174 медиуми биле затворени.
За време на вонредната состојба турскиот Уставен суд беше лишен од основната контролна функција и немаше овластувања да се меша во указите на Ердоган, а Владата можеше да забрани печатење и дистрибуција на весници, списанија, брошури, книги и плакати, како и да ограничи или да забрани дистрибуција на аудио или видео материјали, вклучително и за телевизија, радио или филмови.
За пучот Ердоган го обвинува лидерот на движењето ФЕТО, кое Анкара го смета за терористичка организација, свештеникот Фетула Ѓулен кој се наоѓа во САД и кој финансира голем број невладини организации, приватни школи и универзитети.
Во август 2016 Турција побара од САД го испорачаат Ѓулен.
Ѓулен живее во американската сојузна држава Пенсилванија и негира дека има какви било врски со обидот за соборување на Ердоган.