Василиј и Алексеј Березутски, едни од најпознатите близнаци во фудбалската историја, од денеска и официјално се пензионери. Кариерата ја завршија во московска ЦСКА во која пристигнаа од градскиот ривал, Торпедо. Василиј од тогаш забележа 531 официјален настап за „армејците“, 29 повеќе од неговиот брат Алексеј. Целата фудбалска кариера ја минаа како дефанзивци. Василиј ги покриваше позициите стопер и десен бек, а Алексеј играше како стопер и како лев бек.
Статус на репрезентативци на Русија стекнаа во 2003 година пришто Василиј одигра 101 меч за „зборнаја“ додека Алексеј 58. Првите договори ги потпишаа како тинејџери, на 19 годишна возраст, во пензија заминуваат со 36.
Браќата Березутски имаат шест шампионски титули во руската Премиерлига, на трофејот во националниот куп се радуваа седум пати , пет пати го освојуваа рускиот Суперкуп, а со ЦСКА Москва триумфираа и во Купот на УЕФА во 2005 година.