Претседателот на Турција, Реџеп Таип Ердоган најави дека од денеска Турција ќе ги бојкотира електронските производи од Соединетите Држави кои воведоа санкции и ги зголемија тарифите против Анкара по спорот околу американскиот пастор.
“Ќе ги бојкотираме американските електронски производи, ако тие го имаат iPhone-от, од другата страна е Самсунг . Ние исто така го имаме Венус Вестел (марка на турки брендови за мобилни телефони), кажа Ердоган на одбележувањето на 16 години од формирањето на владејачката Партија на правдата и развојот (АКП).
Ердоган ја предупреди Белата куќа дека оние што водеа “економска војна” против Турција ќе платат цена.
По неколкудневни падови, турската валута во вторникот закрепна и сега вредноста и изнесува 6,5 лири за американски долар.
Критикувајќи ги санкциите од САД, турскиот претседател рече дека Анкара се соочува со “економски напад”.
“Во тек е економски напад врз Турција. Во минатото, таквите работи се правеa тајно, а сега се отворени. Можеме да направиме две работи, економски и политички. Ќе преземеме мерки, Министерството за финансии работи деноноќно. Она што е уште поважно, мислам дека е задржувањето на нашиот политички став”, додаде тој .
Во исто време и турскиот национален авиопревозник „Туркиш Ерлајнс“ започна кампања за бојкот на американски реклами и фирми.
Портапролот на „Туркиш Ерлајнс“, Јахја Устун на Твитер објави хаштаг #ABDyeReklamVerme (НеГиРекламирајтеСАД), апелирајќи и до останатите турски комапнии да се приклучат кон бојкотот.
– „Туркиш Ерлајнс“ ги поддржува нашиот народ и држава, Таква наредба им е дадена на нашите рекламни агенции, додаде Устун најавувајќи го бојкотот.
Повик за бојкотот на американски производи вчера упати и најголемата турска телекоминикациска компанија „Турк Телеком“.
Односите меѓу Анката и Вашингтон се влошија откако САД двојно ги зголемија царините за увоз на челик и алуминиум од Турција и воведоа санкции кон двајца турски министри, како реакција на приведувањето на американскиот пастор Ендрју Бронсон од страна на турските власти.